Презентация - "Презентация "Эрзянь авань оршамопелесь""

Мордовия Республикань Чаунзань буень
«Покш Маризь велень средней общеобразовательной школась» муниципальной бюджетной общеобразовательной учреждениясь

Мордовия Республикань ды мокшэрзянь диаспорань общеобразовательной организациянь 5 – 8 классонь тонавтницятнень туртов дистанционной олимпиада «Путешествие в тайны родного языка»

Эрзянь авань оршамопелесь
(костюм женщины-эрзянки)

Топавтыцятне:
«Пейделькат» командась:
-Гранцова Виктория (5 класс);
-Миркискина Елизавета (5 класс);
-Ботайкина Анастасия (6 класс);
-Прокин Владислав (7 класс);
-Кемайкина Виолетта (8 класс)


2021 ие

Эрзянь авань оршамот



Эрзянь оршамот… Ашо, якстере, раужо, ожо, пиже, сэнь тюст. Кенярксов ёжо казильть тусто, маней викшневкстнэ, сиянь жойть нолдыльть горниповтнэ, гальдерькатне, ярмаконь сюлгамотне, човалясо викшнезь пулайтне; раштыця ковокс цитнесть панготне. Ине мазычи, чипаень гайть, ёвксонь кошт маряви сынст эйстэ, зярдо ванат лангозост музейсэ. Пиземечирькень весе тюстнэ ульнесть минек тейтерявань оршамотнесэ. А стяко XIX пингестэ Парижсэ невтемадо мейле эрзянь оршамотнень мазычист кисэ максозель сырнень медалесь.
Ульнесь мазычи… Ней минек оршамотне ванстовить ансяк музейсэ. Те мазычинть эрзянь аватне кезэрень пингестэ саезь кандсть, теке питнейдеяк питней казне; ванстасть сонзэ, кастасть-келейгавтсть, макссть эйсэнзэ кедьстэ-кедьс, сурсто-сурс: авась – тейтеренстэнь, тейтересь – эсь тейтеренстэнь. Ды истя ламо шкань перть. Эрзянь оршамотне ульнесть «кортыцят», информациянь кандыцят, лиякс меремс, седикеле сонсь оршамось зярыя ёвтниль азоронзо эйстэ.

Эрзянь авань оршамот

Чаунзань буестэ Эрзянь оршамопелень викшниця






















Эрзянь оршамопельтнень свал мазылгавтнесть мазый викшневкстнэ. Викшнемстэ седе сеедьстэ тевс нолдавсть якстере, раужо, чопода-сэнь, седе чуросто, тюсонь топавтомга, - пиже ды тюжа тюсонь понань ды парсеень суретне. Викшневкстнэ ульнесть мазыйть, сельме вановтонь кенярдовтыцят.
Миненек мельспаро сень кувалма, што шабра велесэнек, Ишакувасо (Красногорное), чачсь-кассь эрзянь оршамопелень содавикс викшницясь Людмила Фёдоровна Игнатьева. Савкшность неемс важодевксэнзэ Чаунзань краеведчекой музейсэ экскурсиясо улемстэ. Сынь пек мазыйть. Сонзэ кедьсэ викшневть оршамотнесэ сцена лангсо морсесть С. Люлякина, М. Антонова, Н. Спиркина, Н. Маркова, Н. Кадышева.
Л. Ф. Игнатьевань коллекциясо комсте ламо оршамопелень композицият ды ламо лия важодевкст.



Игнатьева
Людмила Фёдоровна

Л. Ф. Игнатьевань викшневксэнзэ

ЭРЗЯНЬ ОРШАМОПЕЛьтне - карсемапельтне МИНЕК ШКИНЕМАСО

Эрзянь оршамопелень пелькстнэ (элементнэ)

Панар (покай) - рубаха

















Эрзянь авань оршамопельтнестэ сехте эрявиксэкс, юрокс ловови панарось, кона моли неень шкань туниканть ёнов. Сон сивекстэме, ставиль коцтонь кавто келестэ. Панарось мазылгавтневиль викшневкссэ. Кандтнемстэ сон карксамова карксавиль ды аламодо нолдавиль. Панарось ульнесь эрьвачинь оршамопелекс.
Панардо башка, ульнесть покайть. Покаесь – те истя жо панар, ансяк панаронть коряс пек седе сюпавсто викшнезь. Сон кандтневиль а свал. Оршнилизь сонзэ мирденень лисемстэ ды лия покшчива.

Руця (ланга панар,) –
верхняя распашная одежда























Руцясь — а чочневиця оршамопель, кона кандтневи панар ланга. Сон пек сюпавсто викшневи мештева (мештепелькст); ожатне ды руця алксось мазылгавтовильть кой-кона буесэ пек, лия буесэ аволь пек. Сурень тюстнэ ульнесть тусто якстереть, раужот эли чопода-сэнть. Викшневкстнэде башка, руцянть мазылгавтсть парсейведьмесэ, цитниця повнесэ, сырнень тюс суресэ. Руцятне ульнесть истякчинь ды покшчинь. Истякчинсесь мазылгавтозель аволь пек, мерильть тензэ нилева руця (верде алов молить ниле викшнезь кикст-таргавкст). Покшчинсетне: котова руця, кавксова руця. Ульнесть натой кемгавтовонь руцят («Кочкарява палязо, кемгавтовонь руцязо» — эрзянь моросто). Неть руцятне вельть мазыельть. Аварькшнима руцянть лангс кодаткак мазылькат а понгавтневильть. Сонзэ оршнилизе тейтересь мирденень лисема шкасто урнемстэ. Куломанень эрьва авась анокстыль кулома руця. Руцянть ланга сюлмави каркс (кушак): якстере эли пиже.

Пулай –
набедренное украшение

Панар ды покай ланга, кона-кона таркатнесэ руця ланга, эрзянь аватне кандтнесть пулай (пулакш, пулагай, пулокаркс). Сонзэ оршилизь 13-14 иесэ ды кандтнесть куломозост. Пулайтеме тейтерявантень эзь мереве лиснемс ломань сельме икелев, сон лововсь пельсштапо. Пулайтне ульнесть истякчинь ды покшчинь. Истякчинсесь а вельть мазыель, тень кис покшчинсесь цитнесь эрьва кодамо тюссо . Пулаесь оршавиль карксамова,

Карксамопельть - пояса


Пулайде башка, панар ды покай, кой-косо – руця лангаяк, оршамопеленть карксамга кандтнесть келей мазый каркст, конатненень мерсть кушак эли цёко каркс. Сынст кодылизь эрьва кодамо тюсонь понань сурестэ. Мазылгавтнилизь викшневкссэ, човалясо. Певанзо нолдыльть сурестэ теезь цёкот. Суренть юткова нолдыльть мишарат. Седе мазыйстэ теезь кушактнень кандтнесть покшчива. Эрьва чинсетнень мазылгавтнилизь аволь сюпавсто.

Икельга паця - передник
Панаронть ды руцянть ланга эрзяватне кандтнесть мазый икельга пацят (запон, фартук), конатнесэ ульнесть аволь ансяк викшневкст, вастневсть черьведьметь, кружеват, плаштят, плёскат, човалят ды натой ярмакт. Оршнилизь сынст эрьва чистэяк, покшчистэяк. Орданьбуень, Отяжбуень, Чаунзань, Покш Березникень, Дубенкань ды Кочкурбуень эрзяватнень икельга пацяст а пек явовсть вейке вейкень эйстэ. Самарань эрзяватнень икельбацяст ульнесть седе теинеть ды тустосто викшнезь.

Рукават – передник с рукавами





















Ставксонь коряс икельга пацятне ульнесть а вейкеть. Веенстнэнь эйсэ ульнесь ансяк карксамосто саезь ало пелксэсь, омбонстнэ меште ланго мартольть. Колмонстнэ ульнесть пекстазь ды кувака ожа мартольть. Сынест кармасть мереме рукават.

Панго – головной убор

















Эрзянь прясюлмавкстнэ ульнесть эрьва кодат. Мирденень максозь аватне яксильть пангосо. Сынь а вейкетельть. Ульнесть сювозь прят, конат молильть скалонь сюро эли ансяк чачиця ков ёнов. Ульнесть келей конякс марто. Самарань ды Симбирень эрзятне сынст лемдить сорука (сорока) эли шлыган. Пангось мазылгавтневиль. Ало пельксэнь кавто бокатнева педявтовильть якстере коцтонь сюлмамкат. Коняксось мазылгавтовиль човалясо. Сюлмавкс ведьмень петнеяк мазылгавтовильть човалясо. Пангонь коняксонтень ставиль удалга пацясь, кона истя жо мазылгавтневиль викшневкссэ ды човалясо. Од авинетнень пангось якстере тюсонь, сыретнень (50 иеде мейле) – ашо.

Прясуре (коня лента) –
налобное украшение






















Седикеле эрзянь тейтертне коняваст кандтнесть прясуре. Кой-кона таркатнесэ мернесть тензэ коня паця эли коня лента. Прясурень теемасо юрокс ульнесь теине эчке коцт панкс, кона кодавиль- викшневиль эрьва кодамо тюсонь суресэ, мазылгавтовиль вишка повнесэ ды цитниця плёскасо. Эйстэнзэ нолдавильть човалясто теезь вишка цёкинеть. Прясуренть кавто пева теевильть сурестэ цецят, конат истя жо мазылгавтовильть човалясо. Прябокатнева, цецятнень эйстэ нолдавить човалясто теезь цёкот, ансяк седе покшт конявансетнень коряс. Прясуренть пева педявтовильть сюлмамка ведьметь.

Кисточкат (кистючкат) – накосник
Седикеле эрзянь тейтертне кандтнесть аволь вейке черьпуло. Сеедьстэ эйстэст ульнесть кавто. Истя жо кодыльть зярыя черьпулот, лиясто натой кавксошка-вейксэшка, конатнень эйстэ кавтотне, бокаватне, ульнесть седе эчкеть, остаткатне жо седе човинеть. Весе сынь сялговильть ве пусмос сялгомасо – черень мазылгавтомасо, конань эйстэ мольсь гайть. Те сялгомантень мерсть кисточкат (кистючкат).
Истя жо пря сюлмавкстнэнень топавтомакс ульнесть пилекстнэ, конат теевильть аволь ансяк сурестэ ды човалясто. Истя жо сынст тейнесть пухсто.

Эрзянь мазылькатне (украшения)
Сюлгамо - Брошь




Кезэрень эрзяватне пек вечкильть мазылгавтомо кирьгаст, мештест, секс кандтнесть сюлгамот, ламо эрьгекерькст, эрьгень сиветь (кирьгашат). «Эрзяванть васня марясак, мейле несак», - кортасть авань икелень оршамопельденть.
Сюлгамосонть (рузтнэ эйстэнзэ мерить, брошь, брошка) эрзяватне чочилизь панаронь эли покаень сивенть. Сынь эрсильть эрьва кодат: салмукс марто ды салмукстомо. Теемстэнзэ тевс нолдавить мазый эрьва кодамо тюсонь эрьгеть, повнеть, човалят.
Сюлгамось кемекстави меште куншкас: панар сивень кавто пельга теевить килькшкеть, козонь понгавтовить сюлгамонь петне. Бути сюлгамось салмукс марто, сон чочави салмуксонть вельде.

Шубейка - безрукавка



Эрзявань оршамопелень элементэкс истя жо ульнесть шубейкат (безрукавка, жилетка). Сонзэ оршнесть кизна экше чине. Ставиль шубейкась эчке коцтсто, потмова стыльть алгакс (подкладка). Сивева, алга, ожа юрга сивирдавиль якстере эли сэнь тесьмасо. Мазылгавтовиль ашо ды якстере ставкссо.

Эрзянь карсемапельтне (обувь)
Карть - лапти
Эрзятнень сехте сеедьстэ вастневиця карсемапелекс ульнесть карть. Сынст эйсэ кодасть ленгестэ, конань сайнесть од пекшестэ. Картнень марто кандтнесть пракстат. Сындест ульнесть кавто парат. Веенстнэсэ тапарилизь пильге лапатнень полдава, омбонстнэсэ – пильгепектнень.
Покшчинь карсемапелекс ульнесть ламо сормсевкс марто пштилгавтозь нерь марто кемть. Сынст стылизь вазонь эли скалонь кедьстэ. Верьксэст сеедьстэ мазылгавтылизь якстере коцтсо.
Тельня кандтнесть сёрмав ды раужо, седе чуросто – ашо лембе кемть, конань валяилизь ревень понасто.

Игнатьева Людмила «ТЕРДЕМА»

Эрзянь ава, тонеть пшкадьсынь валом,
Пазнэнь озкс теке, потсом кенерсть.
Кувать кандтнинь сынст седеем ало —
Чаво паксява илязт певерть.

Панжить келейстэ эрямонь пареть
Ды стувтозенть одов вельмевтик,
Максык тенек таштазь улипарот —
Викшнезь панарот, дугай, невтить.

Ашо коцтот каик рунгот ланга,
Кумбо ставкссо кемельдик-викшник,
Прязот путык чачиця ков-пангот
Ды пулаеть човалясо стык.

Кода умок, пек кезэрень шкане,
Мазы нурдс чинязавакс озак…
Ёндол ракшанть а варматне панить —
Эрзянь Масторга ёвкс прок ютак.

Тонь сюлгамосто, эрьгестэ жойтесь
Гайтев морокс кадык седейс пры.
Кадык мекев вельмить эрзянь койтне:
Масторлангонь мельспарокс арыть.

Эрзякс сёрмадызе Маризь Кемаль.

Сюкпря ваноманть кис!

Вастомазонок!